திருமலை திருப்பதி தேவஸ்தானம் முக்கிய அறிவிப்பு ஒன்றை வெளியிட்டுள்ளது

திருப்பதி ஏழுமலையான் கோவிலுக்கு பாத யாத்திரை செல்லும் மலைப்பாதை மூடப்படுவதாக தேவஸ்தானம் அறிவித்துள்ளது.

ஆந்திர மாநிலம் திருப்பதியில் உலகப் பிரசித்திப் பெற்ற ஏழுமலையான் கோவில் உள்ளது. இந்தக் கோவிலுக்கு உள்ளூர், வெளி மாநிலங்கள் மற்றும் வெளி நாடுகளில் இருந்தும் கோடிக் கணக்கான பக்தர்கள் வந்துச் செல்வர்.

கடந்த 2020 ஆம் ஆண்டு, இந்தியாவில் கொரோனா வைரஸ் தொற்று பரவத் தொடங்கியதை அடுத்து, திருப்பதி ஏழுமலையான் கோவிலுக்கு வரும் பக்தர்களுக்கு பல்வேறு கட்டுப்பாடுகள் விதிக்கப்பட்டன. கொரோனா பரவல் குறைந்ததை அடுத்து, தற்போது பக்தர்கள் தரிசனத்திற்கு அனுமதிக்கப்பட்டு வருகின்றனர். எனினும் கட்டுப்பாடுகள் விதிக்கப்பட்டுள்ளன.

இதற்கிடையே, ஆந்திர மாநிலத்தில் நாளை மற்றும் நாளை மறுநாள் கனமழை பெய்ய வாய்ப்பு இருப்பதாக இந்திய வானிலை ஆய்வு மையம் எச்சரிக்கை விடுத்துள்ளது. இதை அடுத்து முதலமைச்சர் ஜெகன் மோகன் ரெட்டி மழை தொடர்பான முன்னெச்சரிக்கை நடவடிக்கைகளை எடுக்கும்படி அதிகாரிகளுக்கு உத்தரவிட்டுள்ளார்.

இந்நிலையில், பலத்த மழை எச்சரிக்கை விடுக்கப்பட்டு உள்ளதை அடுத்து, திருப்பதி ஏழுமலையான் கோவிலுக்கு பாத யாத்திரை செல்லும் மலைப் பாதை, நாளை மற்றும் நாளை மறுநாள் வரை மூடப்படுவதாக திருமலை திருப்பதி தேவஸ்தானம் அறிவிப்பு வெளியிட்டு உள்ளது. பாத யாத்திரையாக நாளை மற்றும் நாளை மறுநாள் பக்தர்கள் செல்ல தடை விதிக்கப்பட்டு உள்ளது.

அண்மையில், திருப்பதியில், மத்திய உள்துறை அமைச்சர் அமித் ஷா தலைமையில், தென் மண்டல மாநில முதலமைச்சர்களின் கூட்டம் நடைபெற்றது குறிப்பிடத்தக்கது. இக்கூட்டத்தில், தமிழக முதலமைச்சர் மு.க.ஸ்டாலினுக்கு பதில், அமைச்சர் பொன்முடி பங்கேற்றது குறிப்பிடத்தக்கது

https://tamil.samayam.com

திருப்பதிக்கு பாத யாத்திரையாக செல்ல 2 நாட்கள் தடை