தொடர் கனமழை காரணமாக மீண்டும் ஆன்லைன் வகுப்புகள்

மழை விடுமுறை கிடையாது; மாணவர்களுக்கு இப்படியொரு ஏற்பாடு!

கனமழை வெளுத்து வாங்கி வரும் நிலையில் பள்ளிகளுக்கு தொடர் விடுமுறை அளிக்க வேண்டிய கட்டாயம் ஏற்பட்டுள்ளதால் மாற்று நடவடிக்கைகள் முன்னெடுக்கப்பட்டுள்ளன.

தொடர் கனமழை காரணமாக பள்ளி, கல்லூரிகளுக்கு விடுமுறை அறிவிப்பு
கற்றல் பாதிக்கப்படக்கூடாது என ஆன்லைன் வகுப்புகளுக்கு ஏற்பாடு
அதேசமயம் மின் தடை இருப்பதால் மாணவர்கள் கட்டாயப்படுத்தப் படவில்லை

தமிழகத்தில் வடகிழக்கு பருவமழை வெளுத்து வாங்கிக் கொண்டிருக்கிறது. இதனால் பள்ளி, கல்லூரிகளுக்கு தொடர் விடுமுறை அறிவிக்கப்பட்டு வருகிறது. இன்றும், நாளையும் ரெட் அலர்ட் விடுக்கப்பட்டுள்ளதால் பொதுமக்கள் தேவையின்றி வெளியில் வர வேண்டாம் என அறிவுறுத்தப்பட்டுள்ளது. கனமழை காரணமாக சென்னை, காஞ்சிபுரம், திருவள்ளூர், செங்கல்பட்டு, கடலூர், நாகப்பட்டினம், தஞ்சாவூர், திருவாரூர் மற்றும் மயிலாடுதுறை ஆகிய மாவட்டங்களில் உள்ள பள்ளி, கல்லூரிகளுக்கு இன்றும், நாளையும் உள்ளூர் விடுமுறை அறிவிக்கப்பட்டுள்ளது. ஏற்கனவே கொரோனா அச்சுறுத்தல் காரணமாக ஒன்றரை ஆண்டுகளாக பள்ளிகள் அனைத்தும் மூடப்பட்டிருந்தன.

வீட்டிலிருந்த படியே ஆன்லைன் வாயிலாக வகுப்புகள் நடத்தப்பட்டன. நடப்பாண்டில் காலதாமதமாக செப்டம்பர் ஒன்றாம் தேதி முதல் பள்ளிகள் திறக்கப்பட்டன. இதையொட்டி பாடத்திட்டங்களும் குறைக்கப்பட்டிருந்தன. இந்த சூழலில் மழை விடுமுறையானது நேரடி வகுப்புகளுக்கு மீண்டும் சிக்கலை ஏற்படுத்தியுள்ளது. இதனால் ஆன்லைன் வகுப்புகளை பல்வேறு பள்ளிகளும் கையிலெடுத்துள்ளன. மழை விடுமுறை என உற்சாகத்தில் இருந்த மாணவர்களுக்கு இது சற்றே ஏமாற்றத்தை அளித்திருப்பதாக தெரிகிறது.


மீண்டும் ஆன்லைன் வகுப்புகள்

இதுதொடர்பாக சில பள்ளி ஆசிரியர்கள் கூறுகையில், ஏற்கனவே கற்றலில் நீண்ட இடைவேளை ஏற்பட்டுள்ளது. எனவே மாணவர்களின் கற்றல் பாதிக்கப்படாத வகையில் அவர்களுடன் தொடர்ந்து இணைந்திருக்கவே விரும்புகிறோம். பல்வேறு தேர்வுகள் நடத்தப்பட வேண்டியுள்ளதால் ஆன்லைன் வகுப்புகள் நடத்தப்பட்டு வருகின்றன. சில இடங்களில் மின்தடை ஏற்பட்டுள்ளது. இதுபோன்ற சமயங்களில் ஆன்லைன் வகுப்புகளில் கலந்து கொள்ள வேண்டும் என மாணவர்கள் கட்டாயப்படுத்தப்படுவது இல்லை என்று தெரிவித்தனர்.

வடகிழக்கு பருவமழை; ராமேஸ்வரத்தில் ஆய்வு மேற்கொண்ட அமைச்சர் தங்கம் தென்னரசு

அதி கனமழை எச்சரிக்கை

80 சதவீதம் அல்லது அதற்கு மேல் மாணவர்கள் வருகை புரிந்தால் தான் ஆன்லைன் வகுப்புகளை நடத்த வேண்டும் என்று சில பள்ளி, கல்லூரி நிர்வாகங்கள் அறிவுறுத்தியுள்ளன. இல்லையெனில் வகுப்புகளை ரத்து செய்ய வலியுறுத்தப்பட்டுள்ளது குறிப்பிடத்தக்கது. இந்நிலையில் வங்கக்கடலில் உருவாகியுள்ள காற்றழுத்த தாழ்வு பகுதியானது காற்றழுத்த தாழ்வு மண்டலமாக வலுப்பெற்று நாளை (நவம்பர் 11) கரையை கடக்கும் என்று வானிலை ஆய்வு மையம் தெரிவித்துள்ளது.

இதன் காரணமாக இன்று முதல் அடுத்த மூன்று நாட்களுக்கு பல மாவட்டங்களில் அதி கனமழை பெய்யக்கூடும் என்று எச்சரிக்கை விடப்பட்டுள்ளது. வரும் 13ஆம் தேதி வங்கக்கடலில் தெற்கு அந்தமான் மற்றும் அதனை ஒட்டிய பகுதிகளில் புதிய காற்றழுத்த தாழ்வு பகுதி உருவாகும் என்றும், இது அடுத்த 48 மணி நேரத்திற்கு ஆழ்ந்த காற்றழுத்த பகுதியாக மாறும் என்று தெரிவிக்கப்பட்டுள்ளது.