புதிதாக உருவாக்கப்பட்ட 9 மாவட்டங்களில் பேரூராட்சி, நகராட்சி வார்டு மறுவரையறை பணி நிறைவு

தமிழ்நாட்டில் காஞ்சிபுரம், செங்கல்பட்டு, வேலூர், ராணிப்பேட்டை, திருப்பத்தூர், விழுப்புரம், கள்ளக்குறிச்சி, திருநெல்வேலி, தென்காசி ஆகிய 9 மாவட்டங்கள் புதிதாக உருவாக்கப்பட்டது. புதிதாக உருவாக்கப்பட்ட 9 மாவட்டங்களை தவிர்த்த மற்ற மாவட்டங்களுக்கு 2019ம் ஆண்டு ஊரக உள்ளாட்சித் தேர்தல் நடந்தது. இதையடுத்து, புதிதாக உருவாக்கப்பட்ட 9 மாவட்டங்களில் ஏற்கனவே ஊரக உள்ளாட்சி அமைப்புகளுக்கு வார்டு மறுவரையறை பணிகள் முடிந்து கடந்த மாதம் 6 மற்றும் 9ம் தேதிகளில் இரண்டு கட்டங்களாக உள்ளாட்சித் தேர்தல் நடத்தி முடிக்கப்பட்டது.

உள்ளாட்சி தேர்தல் நடத்தி முடிக்கப்பட்ட நிலையில் நகர்ப்புற உள்ளாட்சித் தேர்தலை நடத்த மாநில தேர்தல் ஆணையம் தீவிர நடவடிக்கை எடுத்து வருகிறது. புதிதாக உருவாக்கப்பட்ட 9 மாவட்டங்களிலும் உள்ள பேரூராட்சிகள், நகராட்சிகள் எல்லைகள் மறுவரையறை செய்யப்பட்டது. இந்நிலையில், காஞ்சிபுரம், செங்கல்பட்டு, வேலூர், விழுப்புரம் உள்ளிட்ட 9 மாவட்டங்களில் நகராட்சி, பேரூராட்சி எல்லைகளை மறுவரையறை செய்த பணிகள் முடிவடைந்துள்ள நிலையில் மறுவரையறை ஆணையத்தின் பரிந்துரைகள் அரசிதழில் வெளியிடப்பட்டுள்ளது. எனவே, நகர்ப்புற உள்ளாட்சித் தேர்தலுக்கான அறிவிப்பு விரைவில் வெளியாகும் என எதிர்பார்க்கப்படுகிறது