பள்ளி வளாகங்களை தூய்மைப்படுத்தும் பணிகள் தீவிரம்!

கிருஷ்ணகிரி மாவட்டத்தில் 1-ம் வகுப்பு முதல் 8-ம் வகுப்பு வரை நாளை பள்ளிகள் திறக்கப்படவுள்ள நிலையில் பள்ளிகளை தூய்மைப்படுத்தும் பணிகள் தீவிரமாக நடைபெற்று வருகின்றன.



பள்ளி வளாகத்தை தூய்மைப்படுத்தும் பணியில் ஈடுபட்ட ஊழியர்கள்
தமிழகத்தில் கொரோனா பரவல் காரணமாக கடந்தாண்டு மார்ச் மாதம் மூடப்பட்ட தொடக்கப்பள்ளிகள் 19 மாதங்களுக்கு பிறகு நாளை திறக்கப்படுகிறது. கொரோனா விதிமுறைகளை பின்பற்றி பள்ளிகளில் மாணவர்கள் அனுமதிக்கப்படுவார்கள் என தமிழக அரசு தெரிவித்துள்ளது.

இதனால், கிருஷ்ணகிரி மாவட்டத்தில் உள்ள அரசு தொடக்க, நடுநிலைப் பள்ளிகளை தூய்மைப்படுத்தும் பணி தீவிரமாக நடைபெற்று வருகிறது. கிருஷ்ணகிரி கல்வி மாவட்டத்தை பொறுத்தவரையில் 124 அரசுப் பள்ளிகளில், 14,427 மாணவா்கள் படித்து வருகின்றனா்.

மாவட்டத்தில் உள்ள அனைத்து தொடக்கப் பள்ளி, நடுநிலைப் பள்ளி, மற்றும் உயா்நிலைப் பள்ளிகளில் வகுப்பறைகள் மற்றும் பள்ளி வளாகங்கள், கழிவறைகள் சுத்தம் செய்யப்பட்டு கிருமி நாசினி தெளிக்கும் பணியும் நடைபெற்றது. நீண்ட நாள்களுக்கு பிறகு பள்ளிக்கு வரும் தொடக்கக் கல்வி மாணவா்களை பூக்கள், இனிப்புகள் வழங்கி வரவேற்க ஏற்பாடு செய்யப்பட்டுள்ளதாக கல்வித்துறை அதிகாரிகள் தெரிவித்தனர்.